အရေးပေါ်ကာလတွင် အာဟာရဖြည့်တင်းနိုင်ရန် အာဟာရမုန့် (High Energy Ball )အလွယ်တကူပြုလုပ်နည်း

အရေးပေါ်ကာလတွင် အာဟာရဖြည့်တင်းနိုင်ရန် အာဟာရမုန့် (High Energy Ball )အလွယ်တကူပြုလုပ်နည်း

Disclaimer: ဤ High Energy Ball ပြုလုပ်နည်းသည် UNICEF မြန်မာမှ မျှဝေထားသော နည်းလမ်းအား ဒေသတွင်း လူမှုအဖွဲ့အစည်းတစ်ခုမှ စေတနာ့ဝန်ထမ်းအချို့၏ အကူအညီဖြင့် အနည်းငယ်ပြုပြင်ဖန်တီးထားခြင်းဖြစ်ပါသသည်။ ဤ High Energy Ball ပြုလုပ်နည်းသည် အာဟာရချို့တဲ့သောကလေးများ (Acutely Malnourished) ကလေးများအတွက် Ready-to-use Therapeutic Food (RUTF) အာဟာရဆေးအစာများ မရရှိနိုင်သည့် အခြေအနေတွင် အစားထိုးအသုံးပြုရန်ဖြစ်ပါသည်။

လက်ရှိအရေးပေါ်ကာလတွင် ပြည်တွင်း/ ဒေသခံကူညီကယ်ဆယ်ရေး အဖွဲ့များ ကျန်းမာရေးနှင့်ညီညွတ်၍ ပြုလုပ်ရန်လွယ်ကူသော နည်းလမ်းတစ်ခုဖြစ်ပါသဖြင့် ဥာဏ်ရှိသလိုအသုံးချရန် မျှဝေပေးရခြင်းဖြစ်ပါသည်။ ပုံမှန် အစားအစာများကို မစားသုံးပဲ ဤ High Energy Ball ကိုရေရှည်စားသုံးမည်ဆိုပါက ကျန်းမာရေးကို ထိခိုက်နိုင်ပါသည်။ (ကျွမ်းကျင်ပညာရှင်ဖြင့် မတိုင်ပင်ပဲရေရှည်စားသုံးပါက ဆီးချို၊ အဝလွန် စသည့် ရောဂါများဖြစ်ပေါ်လာနိုင်သည့်အတွက် သတိနှင့်အသုံးပြုရန်လိုအပ်ပါသည်။

High Energy Ball ပြုလုပ်ရာတွင် ပါဝင်ပစ္စည်းများ

• မြေပဲ/ ကုလားပဲ (250g)

• သကြား/ ထန်းလျက် (250g)

• နှမ်းလှော်စေ့ (40g)

• ငါးနီတူအမှုန့် (60g) (မရနိုင်ပါက မထည့်လည်းရပါသည်၊ ငါးနီတူကဲ့သို့ ငါးသေးသေးအခြောက်ကို အမှုန့်ထောင်းထည့်ရလည်း ရပါသည်။)

• ရေ (60 ml) ခန့်

စုစုပေါင်းအာဟာရတန်ဖိုး

• စွမ်းအင်: 2,759 kcal

• ပရိုတင်း: 104g

• အဆီ: 145g

• ကယ်လ်ဆီယမ်: 1,367mg

• သံဓာတ်: 20mg

• ဗီတာမင် B အုပ်စု (B1, B2, B3, B6)

• ဗီတာမင် E: 21mg

ဖော်ပြပါပမာဏအတိုင်း ပြုလုပ် ထုပ်လုပ်သည့် အာဟာရမုန့်သည် အောက်ပါ ခန့်မှန်းအာဟာရတန်ဖိုးကို ပေးစွမ်းနိုင်ပါသည်။ အာဟာရမှုန့် ၁ ဂရမ်တွင် အင်အားတန်ဖိုး 3 -4 kcal အထိ ပါဝင်နိုင်ပါသည်။ ဤ ဖော်မူလာအတိုင်း (ငါးမှုန့်အပါအဝင်) ပြုလုပ်ထားသော အာဟာရမုန့်၏ အလေးချိန် ၁၀၀ ဂရမ်တိုင်းတွင် ပရိုတင်းဓါတ်/ အသားဓါတ် ၉ ဂရမ်ခန့် (ခန့်မှန်း) ပါဝင်သဖြင့် ကြက်ဥပုံမှန်ဆိုဒ်တစ်လုံးစားသုံးခြင်းမှ ရရှိနိုင်သည့် အသားဓါတ်ပမာဏကို ရရှိနိုင်ပါသည်။ ပရိုတင်းပါဝင်မှုသည့် ငါးမှုန့် ထည့်ဝင်မှုပေါ်တွင် များစွာမူတည်ပါသည်။

ပြုလုပ်နည်းအဆင့်ဆင့်

• မြေပဲကိုလှော်၍အခွံချွတ်ပြီး ထောင်းထားပါ။

• သကြား/ ထန်းလျက်ကို ဖော်ပြပါ ရေပမာဏ အချိုးအစားဖြင့် ပေါက်စည်းကျ အနေအထားရအောင် အရည်ကြိုပါ။

• မြေပဲမှုန့်၊ ငါးမှုန့်၊ နှမ်းလှော်စေ့တို့ကို ထန်းလျက်ရည် ပေါက်စည်းကျဖြင့် ရောနယ်ပါ။

• ထို့နောက် မိမိအတွက် အဆင်ပြေသလို အလုံး/ အပြားများ ပြုလုပ်၍ အနည်းငယ် အခြောက်ခံပါ။

ထုပ်ပိုးနည်း

ပြုလုပ်ပြီးသော အာဟာရမှုန့် အလုံးအပြားများကို လေစုပ်အိပ်တွင် ထည့်သွင်းထုပ်ပိုးရန် အကြံပြုပါသည်။ တစ်ထုပ်လျှင် အာဟာရမုန့် ၁၀၀ – ၂၀၀ ဂရမ်အထိ ထည့်သွင်း ထုပ်ပိုးနိုင်ပါသည်။ထိုသို့ထုပ်ပိုးခြင်းဖြင့် အာဟာရဓာတ်များ ပိုမိုကြာရှည်ခံစေပါသည်။ လေနှင့်မထိတွေ့သဖြင့် အနံ့အရသာ မပျက်စေပါ။ ဘက်တီးရီးယားနှင့် မှိုများ ဝင်ရောက်ခြင်းမှ ကာကွယ်ပေးပါသည်။ ထုပ်ပြီးသော အာဟာရမုန့်ထုပ်များကို အေး၍ ခြောက်သွေ့သော နေရာတွင် သိပ်ဆည်း ပို့ဆောင်နိုင်ပါသည်။ မိမိတို့၏ ကိုယ်ပိုင် စမ်းသပ်ချက်အရ ဤအတိုင်းထပ်ပိုးသိမ်းဆည်းမည်ဆိုပါက အနည်းဆုံး အချိန် (၁) လခန့် မပျက်မစီးပဲ သိမ်းဆည်း သုံးဆောင်နိုင်သဖြင့် ဤကဲ့သို့ အရေးပေါ်ကာလ အာဟာရဖြန့်ဖြူးရာတွင် အလွန် အကျိုးရှိနိုင်ပါသည်။

အထူးသတိပြုရန်

• ဤသို့ထုတ်လုပ်ရတွင် သန့်ရှင်းမှုသည်အလွန်အရေးကြီးပါသည်။

• ထုပ်လုပ်မှုတွင် ပါဝင်သူများအားလုံး လုပ်ငန်းမစတင်မီ လက်ကို ဆပ်ပြာနှင့် စင်ကြယ်ဆေးပါ။ ဖြစ်နိုင်ပါက လက်အိပ်ဝတ်ဆင်ပါ။

• ထုပ်လုပ်ရာတွင် အသုံးပြုသည့် အိုးခွက် ပန်းကန်များ၊ ထုပ်ပိုးသည့် ပစ္စည်းများသည်လည်း သန့်ရှင်းစင်ကြယ်ရပါမည်။

• ထုပ်လုပ်သည့်နေ့စွဲကို အမြဲမှတ်တမ်းတင်ပါ။

• မြေပဲ/ နှမ်းတို့နှင့် ဓါတ်မတည့်သူများအတွက် မသင့်တော်ပါ။

• ပုံမှန်အစားအသောက်များဖြင့် ရေရှည်အစားထိုးရန် မသင့်တော်ပါ။ အရေးပေါ်ကာလတွင် စေတနာ့ဝန်ထမ်း အဖွဲ့အစည်းများ အသုံးပြုလိုပါက ပြုနိုင်ရန် မျှဝေပေးခြင်းသာဖြစ်ပါသည်။

• အသက် (၆) လအောက်ကလေးများကို ကျွေးရန်မဟုတ်ပါ။​ အသက် (၆)​ လအောက်ကလေးများကို မိခင်နို့တစ်မျိုးတည်းသာ တိုက်ကျွေးရပါမည်။​

တစ်စုံတရာ ဆွေးနွေးတိုင်ပင်လိုပါက အီးမေး [email protected] သို့ ဆက်သွယ်မေးမြန်းနိုင်ပါသည်။ အသုံးဝင်မည်ထင်သည့် သူများဖြင့် Share လုပ်ပေးပါ။ ကိုယ်တိုင်ကိုယ်ကျ ဘာမှဝင်ကူနိုင်စွမ်းမရှိတဲ့အတွက် တတ်နိုင်သလောက် မျှဝေပေးရခြင်းဖြစ်ပါသည်။ ကျေးဇူးတင်ပါသည်။

မိခင်နို့တိုက်ကျွေးခြင်းနှင့် အာဟာရဆိုင်ရာအကြံဉာဏ်များကို ဒို့မိသားစုလေး – Dohmeetharsulay သို့ဆက်သွယ် အကူအညီတောင်းခံနိုင်ပါသည်။​

ဤ Recipe ၏ မူရင်းကို မျှဝေပေးခဲ့ဘူးသော UNICEF Myanmar ကိုလည်း ကျေးဇူးတင်ရှိပါသည်။