ပြီးခဲ့တဲ့အပတ်က အမေးအဖြေမှာ အိမ်လုပ်စားစရာများ (Home Made Food) နဲ့ အသင့်စား စားစရာများ (Ready Made Food) တွေအကြောင်း ဆွေးနွေးခဲ့တာလေးကို မိဘတွေအနေနဲ့ လေ့လာနိုင်အောင် ပြန်လည်မျှဝေပေးလိုက်ပါတယ်။ အိမ်လုပ်စားစရာတွေနဲ့ အသင့်စားစားစရာတွေမှာ သူ့ရဲ့ ကောင်းကွက်နဲ့သူ၊ သူ့အားနည်းချက်နဲ့သူ ရှိနေပါတယ်။ မိဘတွေအနေနဲ့ကတော့ မိမိရင်သွေးအတွက် ကိုယ်တိုင်ချိန်ဆ ရွေးချယ်နိုင်အောင် အစားအစာတွေနဲ့ ကောင်းကွက်နဲ့ အားနည်းချက်တွေကို အောက်မှာဖော်ပြထားတဲ့အတိုင်း မျှဝေပေးလိုက်ပါတယ်
အိမ်လုပ်စားစရာတွေရဲ့ကောင်းကွက်များ
- မိခင်က လတ်ဆတ်ဆုံးနှင့် အကောင်းဆုံးသော သစ်သီးများ၊ ဟင်းသီးဟင်းရွက်များ၊ အသားများ၊ ငါးများကိုရွေးချယ် ချက်ပြုတ်နိုင်ပါတယ်။
- အမေကိုယ်တိုင် ကလေးရဲ့ အစားအစာကို ဘာစားသင့်တယ်၊ ဘာတော့ မစားသင့်ဘူး စသည်ဖြင့် ဆုံးဖြတ်ထိန်းချုပ်နိုင်ပါတယ်။
- ငါး ကျွေးခြင်းဖြင့် သဘာဝ Omega 3 ကို ရရှိစေနိုင်ပါတယ်။
- ကလေးကို သူ့အနေနဲ့ တစ်နှစ်နှင့်အထက် အရွယ်ရောက်လာတဲ့အခါ သူစားရမယ့် ဒေသထွက် အစားအစာတွေရဲ့ အရသာ၊ အနံ့၊ ဖွဲ့စည်းပုံ၊ အပျော့အမာတို့ကို မိတ်ဆက်ပေးနိုင်ပါတယ်။
- ကလေးတွေကို အစားအစာမျိူးစုံကို လက်ခံတတ်အောင် သင်ကြားပေးပြီး၊ အစားကောင်းတဲ့ကလေး ပိုဖြစ်စေနိုင်ပါတယ်။
- ကလေးတစ်ယောက်နဲ့တစ်ယောက်က မတူပါဘူး။ အမေက ကိုယ့်ကလေးဘာကြိုက်တတ်တယ်၊ ဘယ်လိုပုံစံကြိုက်တတ်တယ်ဆိုတာကို သိပြီး ကလေးအတွက် တစ်နေ့တာလိုအပ်ချက်ကို ချိန်ညှိကျွေးမွေးနိုင်ပါတယ်။
- သဘာဝအစားအစာတွေက ရရှိတဲ့ အာဟာရဓါတ်တွေက အစာချေဖျက်နိုင်ဖို့၊ အစာလမ်းကြောင်းမှာ စုပ်ယူနိုင်ဖို့နဲ့၊ ခန္ဓာကိုယ်က စုပ်ယူထားတဲ့ အာဟာရဓါတ်တွေကို ကောင်းမွန်စွာ အသုံးချနိုင်ဖို့အတွက် ပိုမိုကောင်းမွန်ပါတယ်။
- ချက်ပြုတ်ပြင်ဆင်တဲ့အခါ တာရှည်ခံဆေးဝါးတွေ၊ ထပ်ပေါင်းထည့်ထားတဲ့ အရာတွေ၊ ဓါတုပစ္စည်းတွေ မပါဝင်ပါဘူး။
- ကုန်ကျစရိတ် သက်သာပြီး မိသားစုအတွက် အရေးပေါ်အခြေအနေတွေနဲ့ ကလေးပညာရေးအတွက် သုံးစွဲနိုင်ဖို့ ငွေပိုစုမိစေနိုင်ပါတယ်။
- အမေက ကလေးရဲ့ အာဟာရနဲ့ ကျန်းမာရေးအတွက် ဘာကျွေးရမယ်ဆိုတာ ကိုယ်တိုင် ဆုံးဖြတ်ချက်ချပြီး လုပ်ကိုင်ကျွေးမွေးတဲ့အတွက် အမေအနေနဲ့ ဂုဏ်ယူရတဲ့ခံစားချက်မျိုးကို ခံစားရစေနိုင်ပါတယ်။
- သစ်သီးဝလံနဲ့ ဟင်းသီးဟင်းရွက်တွေမှာ ပါတဲ့ အမျှင်ဓါတ်ကြောင့် ဝမ်းချုပ်ခြင်းမှလည်း ကာကွယ်ပေးနိုင်ပါတယ်။
- အမေသည် မိသားစုအတွက်သူမဝယ်ယူတဲ့ အစားအစာတွေကို အသုံးပြုနိုင်တယ်။ အထွေအထူးစားစရာ ထပ်ဝယ်ရန်မလိုအပ်ပါ။
အိမ်လုပ်စားစရာတွေရဲ့အားနည်းချက်များ
အမေကအစားအစာကို အချိန်ပေးပြင်ဆင်ရတယ်။
အသင့်စား အစားအစာတွေရဲ့ကောင်းကွက်များ
- အသုံးပြုရ လွယ်ကူတယ်။
- အချိန်ကို ချွေတာနိုင်တယ်။
- မိခင်က သူမသူငယ်ချင်းတွေလိုပဲ လုပ်နေတာကြောင့် သူငယ်ချင်းများကလက်ခံကြတယ်။
- အမေက သူ့ကလေးကို အကောင်းဆုံးလုပ်ပေးနေတယ်လို့ ခံစားရတယ်။
အသင့်စား အစားအစာတွေရဲ့အားနည်းချက်များ
- ကုမ္ပဏီက ဖော်စပ်ထားတဲ့အတိုင်းသာ ကလေးကျွေးခွင့်ရှိတယ်။
- အမေအနေနဲ့ ကလေးရဲ့ အစားအစာထဲမှာ ပါရှိတဲ့အရာကို မထိန်းချုပ်နိုင်ပါ။
- ကလေးက နိုင်ငံခြားအရသာရှိသော အစားအစာများကို ကြိုက်နှစ်သက်သွားတယ်။ နောက်ပိုင်းမှာ ထမင်း၊ မြန်မာအစားအစာများနှင့် သွားရည်စာတွေကို စားရန်ငြင်းဆန်နိုင်တယ်။
- အလွန်စျေးကြီးပါတယ် ၁ ဘူး (ကျပ် ၆၀၀၀ မှ ၁၀၀၀၀ အထိ) – အားဖြည့်ဆန်ဆိုပါက ၂ ကီလိုဂရမ် ( ၁ ပြည်ခန့်) ကို ၃၀၀၀ မှ ၃၅၀၀ ကျပ်ခန့်သာ ကျသင့်ပါတယ်။
- အစားအစာ အပျော့အမာက တစ်ပုံစံတည်း အတူတူပင်ဖြစ်တယ်။ ဒါကြောင့် ကလေးစာ ဝါးရန်မလိုအပ်ဘဲမျိုချရန်သာ သင်ယူတော့တယ်။ နောက်ပိုင်း ပုံမှန် အစားအစာတွေ ကျွေးတဲ့အခါ ပြဿနာတွေ ပေါ်လာတတ်တယ်။
- အစားအစာတွေက မလတ်ဆတ်နိုင်ဘူး။ ဘယ်တုန်းတည်းက ခူးဆွတ် ရိတ်သိမ်းထားလဲဆိုတာ မသိရဘူး။ ဘယ်လို ကိုင်တွယ် ပြင်ဆင်ထားလဲဆိုတာ မသိရဘူး။
- အစားအစာ ပြင်ဆင်ထုတ်လုပ်တဲ့လုပ်ငန်းစဥ်တစ်လျှောက်မှာ ဓါတုပစ္စည်းများစွာကို အသုံးပြုထားတယ်။
- အလွန်အမင်း ပြုပြင်ထားတဲ့ အစားအစာတွေဖြစ်လို့ သဘာအတိုင်း မဟုတ်တော့ပါ။
- အရသာအားလုံးက လူလုပ်အရသာတွေပဲဖြစ်တယ်။ အသီးအရသာဆိုပေမယ့် တကယ့်အသီးတွေက ရတာမဟုတ်ပါ။
- ကြာရှည်ခံအောင် ဆေးဝါးတွေ အများကြီးသုံးထားတယ်။
- အာဟာရဓါတ်တွေကလည်း လူကနေဖန်တီးထားတဲ့ အရာတွေဖြစ်တယ်။ သဘာဝအတိုင်း ရတဲ့ အာဟာရမဟုတ်ပါ။
- ပြုပြင်ထုတ်လုပ်စဥ်မှာ ခဲဓါတ်၊ cadmium ဓါတ် နဲ့ ပြဒါးဓါတ် လို အန္တရာယ်ရှိတဲ့ အရာတွေ ပါဝင်နေတတ်တယ်။ ဒီလိုပြဿနာတွေကို အမေရိကန်နိုင်ငံမှာ တွေ့ရဘူးတယ်။
ဒီအချက်အလက်လေးတွေက ဖေဖေမေမေတွေအတွက် အကျိုးရှိစေမယ်လို့ မျှော်လင့်ပါတယ်။
အားလုံးပဲကျန်းမာပျော်ရွှင်တဲ့မိသားစုတွေ ပိုင်ဆိုင်နိုင်ပါစေလို့ ဆုမွန်ကောင်းတောင်းအပ်ပါတယ်။ Healthy and Happy Families ရဲ့ Page ကိုလည်း Like & Share လုပ်ထားကြပါဦးနော်။
