ပြီးခဲ့တဲ့အပတ်က အမေးအဖြေမှာ အိမ်လုပ်စားစရာများ (Home Made Food) နဲ့ အသင့်စား စားစရာများ (Ready Made Food) တွေအကြောင်း ဆွေးနွေးခဲ့တာလေးကို မိဘတွေအနေနဲ့ လေ့လာနိုင်အောင် ပြန်လည်မျှဝေပေးလိုက်ပါတယ်။ အိမ်လုပ်စားစရာတွေနဲ့ အသင့်စားစားစရာတွေမှာ သူ့ရဲ့ ကောင်းကွက်နဲ့သူ၊ သူ့အားနည်းချက်နဲ့သူ ရှိနေပါတယ်။ မိဘတွေအနေနဲ့ကတော့ မိမိရင်သွေးအတွက် ကိုယ်တိုင်ချိန်ဆ ရွေးချယ်နိုင်အောင် အစားအစာတွေရဲ့ ကောင်းကွက်နဲ့ အားနည်းချက်တွေကို အောက်မှာဖော်ပြထားတဲ့အတိုင်း မျှဝေပေးလိုက်ပါတယ်
အိမ်လုပ်စားစရာတွေရဲ့ကောင်းကွက်များ
အလတ်ဆတ်ဆုံးနှင့် အကောင်းဆုံးသော သစ်သီးများ၊ ဟင်းသီးဟင်းရွက်များ၊ အသားများ၊ ငါးများကို စိတ်ကြိုက်ရွေးချယ် ချက်ပြုတ်နိုင်ပါခြင်း။
အမေကိုယ်တိုင် ကလေးရဲ့ အစားအစာကို ဘာစားသင့်တယ်၊ ဘာတော့ မစားသင့်ဘူး စသည်ဖြင့် ဆုံးဖြတ်ထိန်းချုပ်နိုင်ခြင်း။
ငါး ကျွေးခြင်းဖြင့် သဘာဝ Omega 3 ကို ရရှိစေခြင်း။
ကလေးအသက် တစ်နှစ်နှင့်အထက် အရွယ်ရောက်လာတဲ့အခါ ဒေသထွက် အစားအစာတွေရဲ့ အရသာ၊ အနံ့၊ ဖွဲ့စည်းပုံ၊ အပျော့အမာတို့ကို မိတ်ဆက်ပေးနိုင်ခြင်း။
ကလေးတွေကို အစားအစာမျိူးစုံ လက်ခံတတ်အောင် သင်ကြားပေးနိုင်ပြီး၊ အစားမရွေးတဲ့ကလေး ဖြစ်လာအောင် လေ့ကျင့်ပေးနိုင်ခြင်း။
ကလေးတစ်ယောက်နဲ့တစ်ယောက်က မတူသည့်အတွက် မိခင်က ကိုယ့်ကလေးဘာကြိုက်တတ်တယ်၊ ဘယ်လိုပုံစံကြိုက်တတ်တယ်ဆိုတာကို သိပြီး ကလေးအတွက် တစ်နေ့တာလိုအပ်ချက်ကို ချိန်ညှိကျွေးမွေးနိုင်ခြင်း။
သဘာဝအစားအစာတွေက ရရှိတဲ့ အာဟာရဓါတ်တွေက အစာချေဖျက်နိုင်ဖို့၊ အစာလမ်းကြောင်းမှာ စုပ်ယူနိုင်ဖို့နဲ့၊ ခန္ဓာကိုယ်က စုပ်ယူထားတဲ့ အာဟာရဓါတ်တွေကို ကောင်းမွန်စွာ အသုံးချနိုင်ဖို့အတွက် ပိုမိုကောင်းမွန်ခြင်း။
ချက်ပြုတ်ပြင်ဆင်တဲ့အခါ တာရှည်ခံဆေးဝါးတွေ၊ ထပ်ပေါင်းထည့်ထားတဲ့ အရာတွေ၊ ဓါတုပစ္စည်းတွေ မပါဝင်နိုင်ခြင်း။
ကုန်ကျစရိတ် သက်သာပြီး မိသားစုအတွက် အရေးပေါ်အခြေအနေတွေနဲ့ ကလေးပညာရေးအတွက် သုံးစွဲနိုင်ဖို့ ငွေပိုစုမိစေနိုင်ခြင်း။
မိခင်က ကလေးရဲ့ အာဟာရနဲ့ ကျန်းမာရေးအတွက် ဘာကျွေးရမယ်ဆိုတာ ကိုယ်တိုင် ဆုံးဖြတ်ချက်ချပြီး လုပ်ကိုင်ကျွေးမွေးတဲ့အတွက် မိခင်အနေနဲ့ ဂုဏ်ယူရတဲ့ခံစားချက်မျိုးကို ခံစားရစေနိုင်ခြင်း။
သစ်သီးဝလံနဲ့ ဟင်းသီးဟင်းရွက်တွေမှာ ပါတဲ့ အမျှင်ဓါတ်ကြောင့် ဝမ်းချုပ်ခြင်းမှလည်း ကာကွယ်ပေးနိုင်ခြင်း။
အိမ်လုပ်စားစရာတွေရဲ့အားနည်းချက်များ
အမေကအစားအစာကို အချိန်ပေးပြင်ဆင်ရတဲ့အတွက် အချိန်ကုန်နိုင်ခြင်း။
အသင့်စား အစားအစာတွေရဲ့ကောင်းကွက်များ
အသုံးပြုရ လွယ်ကူခြင်း။
အချိန်ကုန်သက်သာနိုင်ခြင်း။
အသင့်စား အစားအစာတွေရဲ့အားနည်းချက်များ
ကုမ္ပဏီက ဖော်စပ်ထားတဲ့အတိုင်းသာ ကလေးစားနိုင်ခွင့်ရှိခြင်း။
မိခင်အနေနဲ့ ကလေးရဲ့ အစားအစာထဲမှာ ပါရှိတဲ့အရာကို မထိန်းချုပ်နိုင်ခြင်း။
ကလေးက နိုင်ငံခြားအရသာရှိသော အစားအစာများကို ကြိုက်နှစ်သက်သွားပြီး နောက်ပိုင်းတွင် မြန်မာထမင်း၊ မြန်မာအစားအစာများနှင့် သွားရည်စာတွေကို စားရန်ငြင်းဆန်နိုင်ခြင်း။
အလွန်စျေးကြီးခြင်း။
အစားအစာ အပျော့အမာက တစ်ပုံစံတည်း အတူတူဖြစ်သောကြောင့် ကလေးက ဝါးရန်မလိုအပ်ဘဲ မျိုချရန်သာ သင်ယူတော့ပြီး နောက်ပိုင်း ပုံမှန် အစားအစာတွေ ကျွေးချိန်တွင် ပြဿနာတွေ ပေါ်လာနိုင်ခြင်း။
လတ်ဆတ်မှုမရနိူင်ခြင်း။
မည်သည့်အချိန်တည်းက ခူးဆွတ် ရိတ်သိမ်းထားလဲဆိုတာ မသိနိုင်ခြင်း။
မည်သို့ ကိုင်တွယ် ပြင်ဆင်ထားလဲဆိုတာ မသိနိုင်ခြင်း။
အစားအစာ ပြင်ဆင်ထုတ်လုပ်တဲ့လုပ်ငန်းစဥ်တစ်လျှောက်တွင် ဓါတုပစ္စည်းများစွာကို အသုံးပြုထားခြင်း။
အလွန်အမင်း ပြုပြင်ထားသော အစားအစာတွေဖြစ်သောကြောင့် သဘာအတိုင်း မဟုတ်တော့ခြင်း။
အရသာအားလုံးသည် လူလုပ် အရသာတွေပဲဖြစ်နေခြင်း။ အသီးအရသာဆိုသော်လည်း တကယ့်အသီးများမှ ရခြင်းမဟုတ်ပါ။
ကြာရှည်ခံအောင် ဆေးဝါးတွေ အများကြီးသုံးထားခြင်း။
အာဟာရဓါတ်တွေသည်လည်း လူကနေဖန်တီးထားတဲ့ အရာတွေပဲ ဖြစ်ပြီး သဘာဝအတိုင်း ရတဲ့ အာဟာရ မဟုတ်ခြင်း။
ပြုပြင်ထုတ်လုပ်စဥ်မှာ ခဲဓါတ်၊ cadmium ဓါတ် နဲ့ ပြဒါးဓါတ်ကဲ့သို့ အန္တရာယ်ရှိသော အရာတွေ ပါဝင်နေတတ်ခြင်း။( ယခုကဲ့သို့သော ပြဿနာများကို အမေရိကန်နိုင်ငံတွင် တွေ့ရဖူးပါသည်။)
ဒီအချက်အလက်လေးတွေက ဖေဖေမေမေတွေအတွက် အကျိုးရှိစေမယ်လို့ မျှော်လင့်ပါတယ်။
အားလုံးပဲကျန်းမာပျော်ရွှင်တဲ့မိသားစုတွေ ပိုင်ဆိုင်နိုင်ပါစေလို့ ဆုမွန်ကောင်းတောင်းအပ်ပါတယ်
