မိခင်နို့လုံလုံလောက်လောက်မထွက်ရင် ဘာလုပ်နိုင်သလဲ
မေမေတို့ရေ… မေမေတွေမှာမိခင်နို့လုံလုံလောက်လောက်မထွက်ရင် ဘာလုပ်နိုင်သလဲ ဆိုတာနဲ့ပတ်သက်ပြီး နည်းနည်း ပြောပြပါမယ်။
တကယ်တော့ အမျိုးသမီးတွေက မိခင်နို့တိုက်ကျွေးနိုင်ဖို့ သဘာဝက ပေးထားပြီး ရင်သားတွေက မိခင်နို့ ထွက်ဖို့အတွက် ဖန်ဆင်းထားတယ်လို့တောင် ပြောလို့ရပါတယ်။ အပျိုဖော်ဝင်ချိန်၊ ကိုယ်ဝန်ဆောင်စဉ်နဲ့ ကလေးမွေးဖွားပြီးနောက် အချိန်တွေတစ်လျှောက်လုံးမှာ ရင်သားတွေက နို့ချိုတိုက်ကျွေးနိုင်ဖို့ တောက်လျောက် ပြင်ဆင်နေခဲ့တာပါ။
အချို့အမျိုးသမီးတွေက နို့တိုက်နိုင်မှာ မဟုတ်ဘူးလို့ ခံစားမိပေမယ့်လည်း အမျိုးသမီး ၅ ရာခိုင်နှုန်းခန့်လောက်ကသာ ခန္ဓာဗေဒဆိုင်ရာ ဒါမှမဟုတ် ဆေးဘက်ဆိုင်ရာ အကြောင်းရင်းခံတွေ ကြောင့် နို့တိုက်ဖို့ မစွမ်းဆောင်နိုင်တာပါ။
အမျိုးသမီးအများစုအနေနဲ့ မိခင်နို့မတိုက်ကျွေးနိုင်ဘူးဆိုတာက မှန်ကန်တဲ့ဗဟုသုတ၊ လိုအပ်တဲ့ အကူအညီတွေ၊ အထောက်အပံ့တွေမရရှိခဲ့လို့လည်း ဖြစ်ပါတယ်။
ကလေးမွေးနေတဲ့အချိန်၊ မွေးပြီးတဲ့အချိန်တွေမှာ မေမေတွေရဲ့ရင်သားတွေက နို့ဦးရည်ပါနေတဲ့နိုတွေ ရှိနေပါတယ်။ ရင်သွေးလေးမွေးပြီးရင် မေမေတို့ရဲ့ အသား (အရေပြား)နဲ့ ရင်သွေးလေးတို့ရဲ့ အသား (အရေပြား) တို့ကို အသားချင်းထိထားပြီး မေမေတို့ရဲ့ ရင်ဘတ်ပေါ်မှာသားသားမီးမီးလေးတွေကို ၂ နာရီလောက် တင်ပြီးကပ်ထားပေးပါ။ ဒီလိုလုပ်တာက ကလေးကို နို့ဘယ်လိုစို့ရမယ်ဆိုတာသင်ယူဖို့အထောက်အကူပြုပါတယ်။ မေမေတို့ရဲ့ နို့ဦးရည်တွေကို လွှင့်မပစ်ရဘူးနော်။
ရင်သွေးလေးမွေးပြီးတာနဲ့အမြန်ဆုံး ပထမတစ်နာရီအတွင်းမှာ မိခင်နို့တိုက်ရပါမယ်။
ရင်သွေးလေးကို နေ့ရောညပါ မကြာခဏ နို့တိုက်ကျွေးရပါမယ်။
အနည်းဆုံးတစ်နေ့ကို ၈-ကြိမ်ကနေ ၁၂ ကြိမ်၊ဒါမှမဟုတ် ဒါထက်မက နို့တိုက်ရပါမယ်။
မေမေတွေရဲ့ ရင်သားကို လက်နဲ့ နှိပ်နယ်ပေးခြင်းက မေမေတွေနို့ပိုထွက်စေပါတယ်။
မေမေတွေက ကလေးကို မှန်ကန်တဲ့အနေအထားနဲ့ ပွေ့ချီထားဖို့နဲ့ ထိကပ်မှု ကောင်းတဲ့ နို့ငုံမှု ဖြစ်နေဖို့ လိုပါတယ်။ ဒါမှသာ ကလေးတွေက နို့ကို ပိုပြီးတော့ စုပ်ယူနိုင်စေမှာပါ။
မိခင်နဲ့ထိကပ်မှုကောင်းအောင် (နို့ငုံမှုကောင်းအောင်) ဘယ်လိုလုပ်ရမလဲ ဒီအောက်က လင့်က ဗွီဒီယိုလေးမှာ လေ့လာကြည့်နိုင်ပါတယ်။
အနေအထားမှန်မှန်ကန်ကန်နို့တိုက်နိုင်ဖို့ ဒီလင့်က ဗွီဒီယိုလေးမှာ လေ့လာကြည့်ပါနော်။
နို့တိုက်ကျွေးနေတဲ့အချိန်တွေမှာ ရင်သားတွေကို တစ်ဖက်ပြီးတစ်ဖက် အလှည့်ကျ၊တလှည့်စီ တိုက်ကျွေးပေးရမယ်။
မေမေတွေက အစာစားတာကို ကန့်သတ်စားတာမျိုး မလုပ်ပါနဲ့။ စားနိုင်သမျှသာစားပါ။ ကယ်လိုရီ၊ ပရိုတိန်း ခေါ်အသားဓါတ်တို့ လုံလုံလောက်လောက်ရခဲ့ရင် နို့ကောင်းကောင်းထွက်ပါလိမ့်မယ်။
ကလေးအိပ်နေတဲ့အခါ မေမေတွေကလည်း လိုက်ပြီးတော့အနားယူပေးရင် နို့ကောင်းကောင်း ထွက်ပါလိမ့်မယ်။
မိခင်နို့ အစားထိုး နို့မှုန့်တွေ၊ရေနဲ့တခြားအစားအစာတွေကို သားသားမီးမီးလေးတွေကို တိုက်ကျွေးမိခဲ့မယ်ဆိုရင် မိခင်နို့စို့တာ နည်းသွားစေပြီး မေမေတို့ရဲ့ မိခင်နို့ထုတ်လုပ်နိုင်တဲ့စွမ်းအားလည်း ကျဆင်းသွားပါလိမ့်မယ်။တချို့ ဗီတာမင်နှင့် သတ္တုဓါတ်ပါတဲ့ အားဆေးတွေ၊မှန်ကန်တဲ့ အစားအသောက်တွေက မေမေတွေကို နို့ပိုထွက်ဖို့အထောက်အပံ့ပေးနိုင်ပါတယ်။ ဒါပေမယ့် အားဆေးသောက်ဖိူ့အတွက် ဆရာဝန်နဲ့ တိုင်ပင်ဖို့တော့ လိုအပ်ပါလိမ့်မယ်။
မိခင်နို့ ပိုထွက်အောင် ဘယ်လိုလုပ်နိုင်မလဲ နည်းလမ်းလေးတွေကို ဒီလင့်က ဗွီဒီယိုလေးမှာ ကြည့်ရှုလေ့လာနိုင်ပါတယ်။
မိခင်နို့တိုက်ကျွေးခြင်းနဲ့ပါတ်သက်လို့အချင်းချင်း အတွေ့အကြုံ ဗဟုသုတတွေ မျှဝေနိုင်ဖို့၊ အခက်အခဲတွေကို အတူတကွ ဖြေရှင်းနိုင်ဖို့မေ့မေ့ချိုချိုဆိုတဲ့ Group လေးလုပ်ထားပါတယ်။ လင့် လေးကိုနှိပ် Group Member တင်ဖို့ ဖိတ်ခေါ်ပါတယ်။ Member ဝင်တဲ့အခါ မေးခွန်းလေးတွေကိုဖြေပေးဖို့ မမေ့ပါနဲ့နော်။မေမေ့ချိုချို Group ကို ဝင်ရန်။ http://bit.ly/maymaychocho
