ကလေးနို့ဝမဝ ဘယ်လိုသိနိုင်မလဲ

မေမေတို့ရေ…. ဒီနေ့တော့ ရင်သွေးလေးတွေကို မေမေတို့က မိခင်နို့ကောင်းကောင်းတိုက်ကျွေးနိုင်တယ်(သို့) ကလေးကမိခင်နို့ ကောင်းကောင်းရနေတယ်ဆိုတာ သိနိုင်တဲ့ အချက်တွေကို စုစည်းပြီး ဖော်ပြပေးလိုက်ပါတယ်…

မေမေ့ရဲ့ ဘေဘီလေးက

· တက်ကြွပြီး နိုးကြားလှုပ်ရှားနေမယ်

· နို့စို့ပြီးချိန်မှာ ပျော်ရွှင်ပြီး ကျေနပ်နေမယ်

· ၂၄နာရီအတွင်း အနည်းဆုံး ၈ ကြိမ် မိခင်နို့တိုက်ကျွေးတာ ခံရမယ်

· နို့တိုက်နေတဲ့အချိန်မှာ ကလေးရဲ့အခြေအနေကိုကြည့်တဲ့အခါမှာ ကလေးက နို့ကို မျိုချနေတာ တွေ့ရမယ်

· ကိုယ်အလေးချိန် နေ့စဉ် ၂၅ ဂရမ် မှ ၃၅ ဂရမ်ကြား အလေးချိန်တိုးလာမယ်

(ရင်သွေးငယ်လေးက ပထမ ၅ ရက်အတွင်းမှာ မွေးစကိုယ်အလေးချိန်ရဲ့ ၇% ထက်လျော့လာပါတယ်…. ဒါပေမယ့် ၁၀ ရက်မြောက်မှာတော့ မွေးစအလေးချိန်ဆီသို့ ပြန်လည်ရောက်ရှိလာပါတယ်…)

· တတိယမြောက်နေ့မှာ ဝမ်း (၃) ကြိမ် ဒါမှမဟုတ် ဒါထက်ပိုပြီး သွားပါတယ်…ငါးရက်မြောက်ရောက်ရင်တော့ အဝါရောင် ဝမ်းပျော့ပျော့လေးတွေ ၄ ကြိမ် ဒါမှမဟုတ် ဒါထက် ပိုပြီး သွားတတ်ပါတယ်…

· မွေးပြီး ၁ရက်မှာ သွားတဲ့ ဝမ်းအမည်းရောင်က ၅ ရက်လောက်ရောက်ရင် အဝါရောင်ကို ပြောင်းသွားပါတယ်… နောက်ပိုင်းတောက်လျှောက် အဲဒီအဝါရောင်ဘဲ ဆက်ပြီးတော့ သွားပါတယ်….

· မွေးပြီး ၅ ရက်မြောက်ရှိပြီဆိုရင် ကလေးက အရောင်ဖျော့တဲ့ ဆီး (၆) ကြိမ် နှင့် အထက် သွားပါတယ်။ နောက်ပိုင်းတောက်လျှောက်လည်း ဆီးက ၆ ကြိမ်နဲ့ အထက် ရှိရပါမယ်။

အခုဆက်ပြောမယ့်အချက်တွေကတော့ ရင်သွေးလေးက မိခင်နို့ကောင်းကောင်းမရဘူးလို့ပြောနိုင်မဲ့ လက္ခဏာလေးတွေပါဘဲ။

· ရင်သွေးလေးက အရမ်းအိပ်ချင်နေမယ်

· မိခင်နို့တိုက်ပြီးတော့လဲ ဂနာမငြိမ်ဖြစ်နေမယ်..

· (၂၄) နာရီအတွင်း အနည်းဆုံး ၈ ကြိမ် မိခင်နို့မတိုက်ကျွေးဖြစ်ခဲ့တာတွေရှိမယ်…

· မေမေတို့နို့တိုက်နေတဲ့အချိန်မှာ ကလေးရဲ့အခြေအနေကို ကြည့်တဲ့အခါမှာ ကလေးက နို့ကို မျိုချနေတာမျိုး မမြင်မကြား/မခံစားရတာမျိုးရှိမယ်….

· ကိုယ်အလေးချိန် မတိုးဘဲ ဖြစ်နေမယ် (ရင်သွေးငယ်လေးက ပထမ (၅) ရက်အတွင်းမှာ မွေးစကိုယ်အလေးချိန်ရဲ့၇% ထက်ပိုပြီး လျော့လာပေမယ့် ၁၀ ရက်မြောက်မှာမွေးစအလေးချိန်ဆီသို့ ပြန်လည်ရောက်ရှိမလာတာမျိုး ဖြစ်မယ် )

· တတိယမြောက်နေ့မှာ ရင်သွေးလေးရဲ့ ဝမ်းသွားတဲ့ အကြိမ်က (၃) ကြိမ် ထက်နည်းမယ်၊ ငါးရက်မြောက် ရောက်တော့လဲ အရောင်က အညိုရင့် (သို့) အမည်းရောင်ပဲ ဖြစ်နေမယ်…

·ဝမ်းအမည်းရောင်က (၅) ရက်လောက်ရောက်တဲ့အထိ အဝါရောင်ကို မပြောင်းဘဲနဲ့ အမည်းရောင် အဖြစ်နဲ့ဘဲ ရှိနေမယ်….

· (၅) ရက်မြောက်တဲ့နေ့အထိ ဆီးအရောင်က အနီရောင် ဒါမှမဟုတ် အဝါရင့်ရောင်တွေဘဲ ဖြစ်နေပြီးတော့ (၆) ကြိမ်ထက် နည်းနေမယ်…

အဲဒီလက္ခဏာတွေပြသလာခဲ့ရင်တော့ ဆေးကုသမှု ခံယူရမှာ ဖြစ်ပါတယ်…

ရင်သွေးငယ်တို့ ကိုယ်အလေးချိန်တက်လာတယ်ဆိုတာက သူတို့ဟာ လုံလောက်တဲ့ မိခင်နို့ကို ရရှိနေပြီဆိုတဲ့ အကောင်းဆုံးလက္ခဏာဖြစ်ပါတယ်။

(၁) လကနေ (၃) လ အတွင်းရင်သွေးငယ်တွေက တစ်လကို (၁.၅) ပေါင်ကနေ (၂.၅) ပေါင်တိုးသင့်ပါတယ်… (၄) လ ကနေ (၆) လကြားမှာတော့ (၁) ပေါင်ကနေ (၂) ပေါင်လောက်ပဲ ပေါင်ချိန်တက်တော့ပြီး တက်နှုန်းကျသွားပါတယ်… (၆) လပြည့်ပြီးရင်တော့ ကလေးတွေကတစ်လကို (၁) ပေါင်အောက်လောက်ဘဲ ကိုယ်အလေးချိန်တက်ပါတော့တယ်…

ပေါင်ချိန်တိုးတာအပြင် ကလေးအရပ်ရှည်လာတာ၊ BMI Index တိုးလားတာ၊ လှုပ်ရှားလုပ်ကိုင်နိုင်စွမ်းMilestone တွေတိုးတက်လာတာတွေကလည်း ကလေးဟာ ပုံမှန်ကြီးထွားဖွံ့ဖြိုးလာနေတယ်ဆိုတာကိုပြသပါတယ်… ဒါကြောင့်မို့ ကိုယ့်ကလေးမှာ ကမ္ဘာ့ကျန်းမာရေးအဖွဲ့ (WHO)က သတ်မှတ်ထားတဲ့ စံနှုန်းတွေအတိုင်း တိုးတက်မှုတွေ ရှိနေသလားဆိုတာ လစဥ် စစ်ဆေးကြည့်သင့်ပါတယ်…

မိခင်နို့တိုက်ကျွေးခြင်းနဲ့ပါတ်သက်လို့အချင်းချင်း အတွေ့အကြုံ ဗဟုသုတတွေ မျှဝေနိုင်ဖို့၊ အခက်အခဲတွေကို အတူတကွ ဖြေရှင်းနိုင်ဖို့မေ့မေ့ချိုချိုဆိုတဲ့ Group လေးလုပ်ထားပါတယ်။ လင့် လေးကိုနှိပ် Group Member တင်ဖို့ ဖိတ်ခေါ်ပါတယ်။ Member ဝင်တဲ့အခါ မေးခွန်းလေးတွေကိုဖြေပေးဖို့ မမေ့ပါနဲ့နော်။

မေမေ့ချိုချို Group ကို ဝင်ရန်။ http://bit.ly/maymaychocho