ကိုယ်ဝန်ဆောင်နေစဥ်အတွင်းဘယ်လို စားသုံးရမလဲ
အောက်ပါအချက်တွေကတော့ကိုယ်ဝန်ဆောင်နေစဥ်အတွင်းမှာ မိခင်အနေနဲ့ ဘယ်လိုစားသုံးရမယ်ဆိုတဲ့ အကြံပြုချက်အချို့ ဖြစ်ပါတယ်။
၁။နေ့စဥ်အစားအစာမှာ အစာအုပ်စု (၃)စုပါအောင် စားပေးပါ။ ( အင်အားဖြစ်စေသောအစာ၊ ခန္ဓာကိုယ်ကြီးထွားစေသောအစာ၊ရောဂါကာကွယ်စေသောအစာ)
၂။ အသားဓာတ်ကို အောက်ပါအစားအစာတို့မှ ရွေးချယ်စားသောက်နိုင်ပါတယ်။ (ဥအမျိူးမျိုး၊ကြက်သား၊ဘဲသား၊ဝက်သား၊ဆိတ်သား၊ငါး၊ပင်လယ်စာ၊ပဲအမျိုးမျိုး၊တို့ဖူး၊နွားနို့၊ပဲနို့ စသည်…)
၃။ ပင်လယ်စာများဟာ အိုမီဂါ (၃) ကြွယ်ဝတဲ့အစားအစာ ဖြစ်ပါတယ်။ အိုမီဂါ (၃) ဟာ ကလေးငယ်တွေဦးနှောက်ဖွံ့ဖြိုးဖို့ အရေးပါပါတယ်။ ပင်လယ်ငါး ကြီးတာတွေ ဥပမာ-တူနာ၊ငါးမန်း၊ စတဲ့ငါးကြီးတွေကတော့မာကျူရီ/ ပြဒါးဓါတ် ပါတတ်လို့ မစားသင့်ပါဘူး။
၄။ တခြား ငါး၊ ပုဇွန်၊ပင်လယ်စာတွေတော့ စားလို့ရပါတယ်။ တစ်ပတ်မှာ ငါးကို ၆ ကြိမ် ၇ ကြိမ် စားဖို့အကြံပြုထားတာတွေလည်း ရှိပါတယ်။ ရေချိုငါး၊ ပင်လယ်စာ( ပုဇွန်၊ ဂဏာန်း၊ ပြည်ကြီးငါး၊ ပုဇွန်ထုပ်)၊ငါးသေတ္တာ များကိုလည်း စားလို့ရပါတယ်။
၅။ အသား ၊ငါး၊ ဥ၊ ပင်လယ်စာများကို ကျက်အောင် ချက်ဖို့တော့ လိုပါမယ်။
၆။ အစားအစာများကို သန့်ရှင်းစွာ ပြင်ဆင်ဖို့နဲ့ လက်ကိုသေချာစွာဆေးဖို့ အလေ့အကျင့်တော့ လိုအပ်ပါမယ်။
၇။လမ်းဘေးအစားအစာတွေ အများကြီးစားတာကိုတော့ ရှောင်ဖို့လိုပါမယ်။ကိုယ်ဝန်ဆောင်မိခင်တွေက ကိုယ်ခံအားနည်းနေလို့ အစာမသန့်ရင် အလွယ်တကူ ကျန်းမာရေးထိခိုက်နိုင်ပါတယ်။
၈။ကျန်းမာရေးနဲ့ညီညွတ်ပြီး အင်အားဖြစ်စေသော အစားအစာကို စားပေးပါ။ ဥပမာ- ဆန်၊ဂျုံ၊ပြောင်း၊ခေါက်ဆွဲ၊ အာလူး စသည်…
၉။ ဟင်းသီးဟင်းရွက်နှင့်အသီးအနှံများဟာ ကိုယ်ဝန်ဆောင်တွေအတွက် အရေးကြီးပါတယ်။ အစိမ်းရောင်၊ အဝါရောင်အသီးအရွက်တွေဟာ ဗီတာမင်အေ ကြွယ်ဝစွာပါဝင်လို့ တနေ့တကြိမ်တော့ စားသုံးသင့်ပါတယ်။
၁၀။ ရေကို တစ်ရက် (၈)ခွက် ကနေ (၁၀) ခွက် ထိ သောက်ပေးရပါမယ်။ ရေဗူးကို ကိုယ်နဲ့မကွာ အမြဲဆောင်ထားပြီး နည်းနည်းစီ ဖြည်းဖြည်းချင်း သောက်ပေးလို့ရပါတယ်။
၁၁။ နွားနို့၊ ပဲနို့၊ဒိန်ချဥ်ကို ကြိုက်တယ်ဆိုရင် တစ်ရက်ကို (၂) ခွက် (၃) ခွက် သောက်ပေးလို့ရပါတယ်။
၁၂။ ကယ်လစီယမ်အတွက် နွားနို့၊ ပဲနို့ မရနိုင်ရင် တို့ဖူး၊ အစိမ်းရင့်ရောင် ဟင်းသီးဟင်းရွက်၊ ရုံးပတီသီး၊ပန်းပွင့်စိမ်း၊ ဂေါ်ဖီ၊ ပန်းပွင့်၊ အုန်းရည်၊ ထောပတ်သီး၊ နှမ်းဆီ၊အရိုးပါဝါးစားနိုင်တဲ့ ငါးကလေး တွေကနေ ရနိုင်ပါတယ်။ ကြက်ရိုးကနေလည်း ကယ်လစီယမ် ရနိုင်ပါတယ်။
၁၃။ အဆီများတဲ့အစာ၊ ချိုတဲ့အစာတွေတော့ လျော့စားရပါမယ်။ သကြားလုံး၊ ချောကလက်၊ အသင့်စားသွားရည်စာ၊အိတ်ဖောင်း သွားရည်စာ၊ အချိုရည်၊ ဆိုဒါ၊ ရေခဲမုန့်၊ အချိုပွဲများကိုလျော့စားရပါမယ်။
၁၄။ အငံများတဲ့ အစားအစာတွေကိုလည်း လျော့ရပါမယ်။ ငါးံပြာရည်၊ ပဲံပြာရည်၊ ခရုဆီ စတာတွေမှာ အငံဓာတ်များလို့ လျော့စားရပါမယ်။
၁၅။ အချိုမှုန့်ကိုတော့ ကိုယ်ဝန်ဆောင်စဥ်ကော နို့တိုက်နေချိန်ကော ရှောင်သင့်ပါတယ်။
၁၆။ တနေ့ကို (၃) ကြိမ်အဖြစ် တစ်ကြိမ်မှာ အများကြီးစားတာထက် အကြိမ်ရေ (၅)ကြိမ် (၆) ကြိမ် လောက်ခွဲပြီး နည်းနည်းစီ စားပေးတာက ပိုပြီးကောင်းပါတယ်။
ကိုယ်ဝန်ဆောင်ချိန်မှာကျန်းမာရေးနဲ့ ညီညွတ်အောင် ရွေးချယ်စားသောက်တာ လူကိုပိုနေလို့ကောင်းစေသလို ကိုယ်အလေးချိန်ကိုပုံမှန်တိုးစေပါတယ်။ မွေးဖွားရတာလည်း ပိုပြီးလွယ်စေသလို ကျန်းမာသန်စွမ်းတဲ့ ရင်သွေးကိုလည်း ရရှိစေပါတယ်။
