က​လေးတွေကို ​ရေနဲ့ နွားနို့ ဘယ်​လောက် တိုက်ရမလဲ

အားလုံးပဲ မင်္ဂလာပါ။ အခုတစ်လော ဒို့မိသားစုလေး Facebook Page ကနေ အန်တီသဲလ်မာနဲ့ Live အမေးအဖြေလေးတွေလုပ်ဖြစ်တော့ မေးလာတဲ့မေးခွန်းတွေထဲမှာ အမေးများတဲ့ မေးခွန်းတစ်ခုက ရေတိုက်တဲ့အကြောင်းရယ်၊ နို့မှုန့်တိုက်တဲ့အကြောင်းရယ်ပါ။ ဒါကြောင့် လွန်ခဲ့တဲ့လအနည်းငယ်က တင်ထားတဲ့ အကြောင်းအရာလေးတစ်ခုကို ပိုမို ဆီလျော်အောင် ပြန်ရေးပြီး ထပ်မံမျှဝေပေးလိုက်ပါတယ်။ အကြောင်းအရာက ကလေးကိုဘယ်လိုအရည်တွေတိုက်လို့ရလဲ ဆိုတာပဲဖြစ်ပါတယ်။ တကယ်တော့ က‌လေးငယ်တွေကို တိုက်လို့ရတဲ့ သိပ္ပံနည်းကျ အထောက်အထားခိုင်မာတဲ့ အရည်မျိုးအစားက သိပ်အများကြီးမရှိပါဘူး။

ကလေးတွေကိုတိုက်ရတဲ့အရည်များ

နံပါတ် (၁) ကတော့ မိခင်နို့ပါ။ အသက် (၆) လအထိ မိခင်နို့တစ်မျိုးတည်းတိုက်ဖို့လိုပါတယ်။
နံပါတ် (၂) ကတော့ သန့်ရှင်းတဲ့ သောက်ရေပါ။ ရေကိုတော့ အသက် (၆) လ ပြည့်တာနဲ့ တိုက်နိုင်ပါပြီ။
နံပါတ် (၃) ကတော့ နွားနို့ပါ။ နွားနို့ကိုတော့ ကလေးအသက် (၁) နှစ်ပြည့်တာနဲ့ တိုက်လို့ရပါပြီတဲ့။

မတိုက်သင့်တဲ့အရည်များ

 သကြား သို့မဟုတ် အချိုပါတဲ့ မည့်သည့်အရည်ကိုမှ အသက် (၅) နှစ်အောက်ကလေးတွေ လုံး၀ မတိုက်သင့်ပါဘူးတဲ့။
မတိုက်သင့်တဲ့အရာတွေထဲမှာ
 အချိုပါတဲ့ နွားနို့ (Sweetened Milk)၊
 ကလေးတွေအတွက် ဆိုပြီးထုတ်ထားတဲ့ Baby Tea လိုဟာမျိုးတွေ၊   အချိုရည်တွေ၊
 Malt Milk တို့ Oat Milk တို့လို အနှံ (cereal) ကနေလုပ်ထားတယ်ဆိုတဲ့
အရည်တွေ ပါပါတယ်။
လက်ဖက်ရည်၊ ကော်ဖီတွေလည်း မတိုက်ရပါဘူး။
 ဒါ့အပြင် Toddler Milk/ Growing-up Milk လို့ခေါ်တဲ့ ဖော်မြူလာတွေလည်း မတိုက်သင့်ပါဘူးတဲ့။

ဒါဆိုတိုက်လို့ရတဲ့ အရည်တွေကိုရော တစ်နေ့ကို ဘယ်လောက်ပမာဏတိုက်လို့ရလဲ မေးစရာရှိပါတယ်။

ရေဘယ်လောက်တိုက်ရမလဲ

အသက် (၆) လ အောက်ကလေးငယ်တွေကို ရေမတိုက်ရပါဘူး။ ဘာလို့လဲဆိုတော့ သူတို့ဟာ မိခင်နို့သာ ရရှိနေစေသင့်တာပါ။ မိခင်နို့ထဲမှာလည်း ရေဓါတ် (၈၀) ရာခိုင်းနှုန်းကျော်ပါဝင်ပါတယ်။ ဒါကြောင့် (၆) လောက်ကလေးငယ်လေးတွေ ရေဆာတယ်ထင်ရင် မိခင်နို့ပဲတိုက်ပါ။ နွေရာသီလို ပူပြင်းတဲ့အချိန်မှာတောင် ရေတိုက်စရာမလိုပါဘူး။ မိခင်နို့ပဲ ခဏခဏတိုက်ပေးပါ။

အသက် (၆) လ မှ (၁၂) လ ကလေးငယ်တွေကိုတော့ ရေစတိုက်နိုင်ပါပြီ။ တစ်နေ့မှာ ခွက် တစ်ဝက်ကနေ (၁) ခွက်အထိ တိုက်နိုင်ပါတယ်။ ရေတိုက်ရင် ခွက်နဲ့ပဲတိုက်ပါ။ နို့ဘူးလိုအရာမျိုးထဲ ထည့်ပြီး မတိုက်သင့်ပါဘူး။ ဒါ့အပြင် ရေကို အစာကျွေးတဲ့အချိန်မှာ တိုက်ပေးနိုင်ပါတယ်။
အသက် ၁ နှစ်ကနေ ၃ နှစ်ထိကိုတော့ တစ်နေ့မှာ ရေ (၁) ခွက်ကနေ (၄) ခွက်ထိ တိုက်ပေးရပါမယ်။

တစ်ခွက် ၂၄၀ မီလီလီတာ

နွားနို့ဘယ်လောက်တိုက်ရမလဲ

အသက် (၁) နှစ်အောက်ကလေးတွေကို နွားနို့ မတိုက်သင့်ပါဘူး။ အသက် (၁) နှစ်ကနေ (၃) နှစ်ကလေးတွေကိုတော့ တစ်နေ့မှာ ၃ ခွက်အထိတိုက်နိုင်ပါတယ်။ အသက် (၁) နှစ်နဲ့ (၂) နှစ်ကြား ကလေးတွေကိုတော့ Full Cream/ Whole Milk မလိုင်ပြည့် နို့ကို တိုက်ရမှာ ဖြစ်ပြီး၊ (၂) အထက်ကလေးတွေကိုတော့ အဆီလျှော့ထားတဲ့ နို့ကို တိုက်ရမှာဖြစ်ပါတယ်။ အသက် (၄) ကနေ (၈) နှစ်ကြားကလေးတွေကိုတော့ တစ်နေ့မှာ (၂) ခွက်ခွဲအထိ တိုက်နိုင်ပါတယ်။ အသက် (၉) နှစ်အထက်ကိုတော့ (၃) ခွက်အထိ တိုက်ပေးရမှာ ဖြစ်ပါတယ်။ နွားနို့နဲ့အဆင်မပြေဘူးဆိုရင်တော့ အချိုမပါတဲ့ ပဲနို့ (Unsweetened Soymilk) ကို ရွေးချယ်နိုင်ပါတယ်။

ကလေးတစ်ယောက်ရဲ့ တစ်သက်တာ အရသာကြိုက်နှစ်သက်မှုပုံစံဟာ သူ့အသက် (၅) နှစ်မတိုင်ခင်မှာ တိုက်ကျွေးခံရတဲ့ အရည်တွေက လွှမ်းမိုးထားပါတယ်။ အချိုပါတဲ့ နွားနို့၊ ပဲနို့တွေကို တိုက်မိရင်၊ အချိုရည်တွေတိုက်မိရင် ကလေးတွေဟာ တစ်သက်လုံးအချိုကြိုက်သွားပြီး နောက်ပိုင်းမှာ ဆီးချိုသွေးချိုလိုရောဂါမျိုးတွေ ဖြစ်နိုင်ခြေ များလာနိုင်ပါတယ်။