အသက် (၆) လမှာ ကလေးကို ဖြည့်စွက်စာစတင်ကျွေးမွေးတဲ့အချိန်ဟာ မေမေတို့အတွက် (သို့) မိသားစုအတွက် အကြီးမားဆုံး၊အရေးကြီးဆုံး ခြေလှမ်းအစတစ်ခု ဖြစ်ပါတယ်။
ကမ္ဘာ့ကျန်းမာရေးအဖွဲ့အစည်း (WHO) မှအကြံပြုထားသောအချက်များအရ ကလေးအသက် (၆) လအထိ မိခင်နို့တစ်မျိုးတည်း တိုက်ကျွေးရပါမယ်။ ကလေးအသက် (၆) လမှစတင်ပြီး ကိုယ့်အရပ် ကိုယ့်ဒေသတွင်းရရှိနိုင်တဲ့ အာဟာရ ပြည့်ဝတဲ့အစားအစာတွေ (ကစီဓာတ်ပါဝင်သော အစားအစာများ၊ အသားအမျိုးမျိုး၊ ငါးအမျိုးမျိုး၊ ပဲအမျိုးမျိုး၊ အသီးအနှံများနှင့် ဟင်းသီးဟင်းရွက်အမျိုးမျိုး) ကို စတင်ကျွေးနိုင်ပါတယ်။ ကလေးငယ်တွေကို ပြည်တွင်းမှာ ထုတ်လုပ်ရရှိနိုင်တဲ့ အစားအစာတွေကို ဦးစားပေးပြီး ကျွေးသင့်ပါတယ်။ ဒါအပြင် ကလေးအသက် (၂) နှစ်နှင့် (၂) နှစ်ကျော်သည်အထိ မိခင်နို့ဆက်လက် တိုက်ကျွေးသင့်ပါတယ်။
ကလေးကိုဖြည့်စွက်စာစတင်ကျွေးမွေးရာတွင်လိုက်နာရမည့်အချက်များ
(၁) ကလေးကိုမိခင်၏ပေါင်ပေါ်တွင် တင်ပြီးကျွေးပါ။
(၂) နောက်ပိုင်းတွင် ကလေးကိုကြမ်းပြင်တွင်ထိုင်၍ဖြစ်စေ၊ အစာကျွေးသည့်ထိုင်ခုံပေါ်တွင်ထိုင်ခိုင်း၍ဖြစ်စေ ကျွေးမွေးနိုင်ပါတယ်။
(၃) ကလေးကိုအစာကျွေးသောအချိန်သည် အစားအသောက်အကြောင်း သင်ယူလေ့လာသောအချိန် ဖြစ်ပါစေ။
(၄) ကလေးနှင့်အတူထိုင်ပါ၊ စိတ်ရှည်ရှည်ထားပါ၊ စိတ်ပါလက်ပါ အားပေးစကားပြောကြားရင်းကျွေးပါ။
(၅) ကလေးအသက် (၇)လ-(၈)လ ခန့်မှာ ကလေးကိုယ်တိုင် ကိုင်စားနိုင်တဲ့အစာကို ပေးကိုင်ပြီးကျွေးပါ။
(၆) ကလေးများသည်အစားအစာကို ကိုယ်တိုင်စားရန်သင်ယူခြင်းသည် ကလေးဉာဏ်ရည်ဖွံ့ဖြိုးမှုကို အထောက်အပံ့ဖြစ်စေပါတယ်။
(၇) အစာ (ထမင်း) စားချိန်သည် ကလေးအတွက်ပျော်စရာအချိန်လေးတစ်ခု၊ မှတ်သားစရာ သင်ခန်းစာလေးရချိန်တစ်ခုဖြစ်အောင် ဖန်တီးပေးပါ။
(၈) ကလေးအတွက် အစားအစာတည့်၊ မတည့်ကိုသိနိုင်ရန် အစားအစာအသစ်တစ်မျိုးကို ၃-၄ ရက်တခါ စမ်းကျွေးပါ။
(၉) ကလေးကို အစားအစာကျွေးရာတွင် အားပေးစကားများ တတွတ်တွတ်ပြောပေးပါ။အစာမသီးစေရန်၊ မနင်စေရန် ဂရုစိုက်ပါ။
(၁၀) မိသားစုနှင့်အတူစားကာ သင်ယူလေ့လာစေပါ။
(၁၁) အစာကျွေးရာတွင် ကလေး၏ပါးစပ်နှင့် သင့်လျော်သေ်ဇွန်းကို အသုံးပြုပါ။
(၁၂) ကလေးကိုအစားအစာကျွေးမွေးရာတွင် လက်ဖြင့်ကျွေးမည်ဆိုပါက လက်သည်းများသေချာစွာ ညှပ်ထားပါ၊ လက်ကိုဆပ်ပြာဖြင့် ဆေးပါ။
(၁၃) ကလေးကို အစားအစာကျွေးမွေးရာတွင် အချိန်မှန်၊ နေရာမှန်ကျွေးပါ။
အစားအစာကျွေးမွေးရာတွင် ရှောင်ရမည့်အချက်များ
အစားအစာများကို ဝါးပြီးမကျွေးပါနှင့်။
အစားအစာများကို ချေရန်အတွက် သင့်တင့်သောပစ္စည်းများကိုအသုံးပြု၍ ချေကျွေးပါ။
ကလေးမစားလိုပါက ဇွတ်အတင်းအကြပ်မကျွေးပါနှင့်။
ပက်လက်အနေအထားဖြင့်ဖြစ်စေ၊ အိပ်ယာပေါ်တွင်လဲလျောင်းသည့်အနေအထားဖြင့် အစားအစာမကျွေးပါနှင့်။
ကလေးကိုအစားအစာကျွေးမွေးရာတွင် ခြိမ်းခြောက်၍သော်လည်းကောင်း၊ အော်ဟစ်၍သော်လည်းကောင်း မကျွေးပါနှင့်။
ကလေးကိုအစားအစာကျွေးမွေးရာတွင် အရုပ်များဖြင့်ဆော့ကစားစေပြီး မကျွေးပါနှင့်။
TV ကြည့်၍သော်လည်းကောင်း၊ ဖုန်းကြည့်ခိုင်း၍သော်လည်းကောင်း ကလေးကို အစားအစာမကျွေးပါနှင့်။
အစားအစာကျွေးမွေးရာတွင် တစ်ခုခုဖြင့်အာရုံပြောင်းပြီး မကျွေးပါနှင့်။
အသက် ၆-၁၂ လအရွယ်ကလေးကိုအစားအစာစတင်ကျွေးမွေးပုံ
အသက် ၆-၁၂ လအရွယ်ကလေးကိုအစားအစာစတင်ကျွေးမွေးပုံဇယားလေးကို အောက်က လင့်ကလေးကနေ ဒေါင်းလုဒ် ရယူနိုင်ပါတယ်။
သန့်ရှင်းမှု
အစားအစာများကို ရေသေချာဆေးပါ။ ကျက်သည်အထိချက်ပါ။ အစားမကျွေးခင် ကျွေးမည့်သူ၏လက်နှင့် ကလေး၏လက်ကို ဆပ်ပြာဖြင့် သေချာစွာဆေးကြောပါ။ သန့်ရှင်းသောပန်းကန်၊ ခွက်များကို အသုံးပြုပါ။
အကြံပြုချက်များနှင့်သတိထားရန်အချက်များ
(၁) အစားအစာကျွေးပြီးတိုင်းမိခင်နို့တိုက်ကျွေးပါ။
(၂) အသင့်စားအစားအစာများသည် အလွယ်တကူရသော်လည်း သကြားနှင့်အခြားသဘာဝကိုတုပထားသောအရာများ ပါဝင်မှုနှုန်းမြင့်မားပါတယ်။ ထိုအရာများကိုကျွေးခြင်းဟာ ကလေးအသက်ကြီးလာသောအခါ အစားအသောက် ချေးများတတ်ပါတယ်။
(၃) ကလေးအစားအသောက်များ ပြင်ဆင်ချက်ပြုတ်ခြင်းနှင့် ချေခြင်းအတွက် ကြိတ်စက်များ၊ အခြားပေါင်းအိုးများ မလိုအပ်ပါ။ အခြားထောင်းခြေသည့် ကိရိယာပစ္စည်းများကိုအသုံးပြုနိုင်ပါတယ်။
(၄) ကလေးများသည် အစားအစာများကို ပထမအစပိုင်းတွင် ငြင်းဆန်လေ့ရှိပါတယ်။ ၂ကြိမ် ၃ကြိမ်ခန့်ငြင်းသော်လည်း မကျွေးပဲမနေပါနှင့်။ဆက်လက်ပြီး ကြိုးစား၍ ကျွေးပါ။
(၅) ကလေးဝါးစားရန်အတွက် မာသောအရာများကို ပမာဏ အရွယ်အစား အကြီးကြီးမပေးပါနှင့်။ အပိုင်းသေးလေးများပိုင်းပြီး ကျွေးပါ။
(၆) ကမ္ဘာ့ကျန်းမာရေးအဖွဲ့မှ ကလေးအသက် (၁) နှစ်ကျော်သည်အထိ မိခင်နို့အစားထိုးနို့မှုန့်များတိုက်ကျွေးရန် အကြံမပြုထားပါ။
(၇) ကလေးများသည် သဘာဝမှရရှိသောအစားအစာများဖြင့် အကောင်းဆုံးကျန်းမာစွာ ရှင်သန်ကြီးထွားနိုင်ကြပါတယ်။
သဲလ်မာထွန်းသိန်း၊အာဟာရပညာရှင်၊ MS, RDN,IBCLC,RLC
