ဒီမေးခွန်းရဲ့ အဖြေကို အားလုံးသိကြပြီးသားဖြစ်မှာပါ။ ဟုတ်ပါတယ်။ အသက် (၆) လမှာ ဖြည့်စွက်စာ စကျွေးရပါမယ်။ ဘာကြောင့်လဲ။ ဒီမေးခွန်းကတော့ ကျန်းမာရေးဗဟုသုတ လိုက်စားတဲ့ ဖေဖေမေမေတွေ အတွက်တော့ ခက်တဲ့ မေးခွန်းမဟုတ်ပါဘူး။ ဒါပေမယ့် ကလေးတော်တော်များများဟာ သူတို့အသက် (၆) လ မပြည့်ခင်မှာ မိခင်နို့မဟုတ်တဲ့ အစားအစာ တစ်မျိုးမျိုးကို ကျွေးတာကိုခံရပါတယ်။ အမှန်တော့ လူကြီးတွေက ချစ်လို့ ကျွေးကြတာပါ။ ဒါပေမယ့် အကျိုးအကြောင်းအဆိုးအကောင်းကို မသိတော့ ချစ်ရာမရောက်ပဲ ကလေးအတွက် အန္တရာယ်ကျရောက်စေတဲ့ အခြေအနေမျိုးတွေကို ဖန်တီးပေးသလိုဖြစ်သွားတတ်ပါတယ်။
မိခင်တွေ ဖွဲ့ထားတဲ့ Facebook Group လိုနေရာမျိုးတွေမှာ မေမေတွေ သူတို့ရဲ့ (၂) လ (၃) လအရွယ် ဘေဘီလေးတွေကို ထမင်းခွံ့နေတဲ့ပုံလေးတွေ၊ အခြား အာဟာရမှုန့်၊ ထမင်းဘူး စသည်ဖြင့်ခေါ်တဲ့ baby food တွေကို ကျွေးနေတဲ့ပုံလေးတွေကို တမြတ်တနိုးနဲ့ “ သားသား အသက် (၂) လ ပြည့်ပါပြီ။ ဒီနေ့ မန်မန် စစားပါတယ်။ ချစ်ပေးကြပါဦးနော်။” စသည့်ဖြင့် တင်တာကို မကြာခဏ တွေ့ရဘူးပါတယ်။ အဲဒီပုံလေးတွေအောက်မှာ တစ်ချို့ ကျန်းမာရေးဗဟုသုတရှိတဲ့ မေမေတွေက “ စစ်ရေ ကလေးကို အသက် (၆) လ ပြည့်မှ ကျွေးရတယ်။ ကလေး အစာမကျေပဲနေမှာပေါ့။ (၆) လအထိ မိခင်နို့တစ်မျိုးတည်းပဲ တိုက်ပါနော်။” စသည်ဖြင့် ကွန်မန့်လေးတွေ ရေးတာ တွေ့ရတတ်ပါတယ်။ တစ်ခါတစ်လေ ပို့စ်ပိုင်ရှင် မေမေက အဲလို အမှန်ပြင်ပေးတဲ့ မေမေကို ပြန်ရန်တွေ့တာမျိုးတောင်တွေ့ဘူးပါတယ်။ တွေ့ရဘူးတဲ့ ရန်တွေ့သံတစ်ခုက “ကိုယ့်ကလေးကိုယ်ကျွေးတာ ဘာဖြစ်လဲ။ ကျွန်မငယ်ငယ်တုန်းကလည်း (၁) လ တည်းက ထမင်းစားလာတာ။ ခုထိ အကောင်းကြီးပဲ။” ဆိုတာမျိုးပါ။ တကယ်တော့ မကောင်းပါ။ အဲဒီလို နည်းစနစ်အမှားတွေနဲ့ ကျွေးမွေးကြလို့ မြန်မာနိုင်ငံရဲ့ (၅) နှစ်အောက် ကလေးတွေ့ရဲ့ (၃) ပုံ (၁) ပုံနီးပါးဟာ အာဟာရချို့ တဲ့နေတယ်ဆိုတာကို တွေ့ရှိထားပြီးဖြစ်ပါတယ်။
အဲဒီတော့ ဖြည့်စွက်စာကို စနစ်တကျကျွေးသင့်တဲ့အကြောင်း ကိုဆက်ပြောပါမယ်။ ကလေးကို အသက် (၆) လပြည့်မှ မိခင်နို့အပြင် ထပ်ဆောင်း ဖြည့်စွက်စာတွေကို စကျွေးပါ။ ဘာကြောင့်လဲဆိုရင် မိခင်နို့တိုက်ကျွေးတဲ့ ကလေးတွေမှာဆိုရင် အသက် (၆) လ မပြည့်ခင်အထိ မိခင်နို့ကနေ အင်အားဓါတ်တွေ၊ အာဟာရဓါတ်တွေကို ကလေးလိုအပ်သလောက် အပြည့်အ၀ ရနေလို့ပါ။ ဒါပေမယ့် အသက် (၆) လကျော်ပြီဆိုတာနဲ့ မိခင်နို့တစ်မျိုးတည်းဟာ ကလေးအတွက် မလုံလောက်တော့ပါဘူး။ မိခင်နို့က မကောင်းတော့လို့မဟုတ်ပါဘူး။ ကလေးအသက်ကြီးလာတာနဲ့ မိခင်နို့မှာပါဝင်တဲ့ အာဟာရဓါတ်အချိုးအစားပြောင်းလဲလာတာ မှန်ပေမယ့် မိခင်နို့ဟာ ကလေးဘယ်အသက်ရောက်ရောက် ကလေးအတွက် သင့်တော်ပါတယ်။ တစ်ချို့က ပြောကြပါတယ်။ မိခင်နို့က ကလေးအသက် (၆) လ ကျော်ရင် မကောင်းတော့ဘူးလို့။ ဒါဟာ သိပ်ကို ဝမ်းနည်းစရာကောင်းတဲ့ လွဲမှားတဲ့ အယူအဆဖြစ်ပါတယ်။ မိခင်နို့မှာ အာဟာရဓါတ်တွေအပြင် အခြားဘယ်နေရာမှာမှ မရနိုင်တဲ့ ရောဂါတွေကို ကာကွယ်ပေးနိုင်တဲ့ဓါတ်တွေ ပါဝင်နေတာကြောင့် ကမ္ဘာ့ကျန်းမာရေးအဖွဲ့ကြီး (World Health Organization) က မိခင်နို့ကို ကလေးအသက် (၂) နှစ်ကျော်သည်အထိ (ဘယ်တော့နို့ဖြတ်ရမယ်ဆိုတာ မရှိပါဘူး။ ကလေးနဲ့ မိခင်ဆန္ဒရှိသ၍ မိခင်နို့ဆက်တိုက်လို့ရပါတယ်။) တိုက်ကျွေးဖို့ တိုက်တွန်းနှိုးဆော်ထားတာ ဖြစ်ပါတယ်။ ဒါပေမယ့် ကလေးက အသက် (၆) လ ကျော်လာရင်တော့ မိခင်နို့တစ်မျိုးတည်းနဲ့ မလုံလောက်တော့ပါဘူး။ ကလေးက အသက်ပိုကြီးလာတာနဲ့အမျှ အာဟာရလိုအပ်ချက်တွေ ပိုများလာပါတယ်။ ဒါကြောင့် မိခင်နို့နဲ့မဖြည့်စည်းနိုင်တော့တဲ့ အာဟာရဓါတ်တွေကို ဖြည့်စွက်စာက အာဟာရတွေနဲ့ အပြည့်အဝရအောင် ဖြည့်စွက်ပေးတာပါ။ ဖြည့်စွက်စာပါ။ အင်္ဂလိပ်လို Complementary Food ပါ။ ထပ်ဖြည့်တာပါ။ နို့ဖြတ်စာ မဟုတ်ပါဘူး။
နောက်ပြီးကလေးမှာလည်း အစားစာဖို့လိုအပ်တဲ့အခြေအနေတွေဟာ အသက် (၆) လ လောက်မှာ အဆင်သင့်ဖြစ်နေတတ်ပါတယ်။ ကလေးက သူ့ရဲ့ဦခေါင်းနှင့် လည်ပင်းကို ကောင်းကောင်း ထိန်းနိုင်ပြီး၊ သူ့ကို ကူညီပေးမယ်ဆိုရင် မတ်မတ် ထိုင်နိုင်ပါပြီ။ စားစရာများအပေါ် စိတ်ဝင်စားမှု ရှိလာပါတယ်။ (လက်စုပ်တာနဲ့ အစာစိတ်ဝင်စားတာ မတူပါ) ဥပမာ လူကြီးအစားစားနေတယ်ဆိုရင် ပန်းကန်ထဲမှရှိတဲ့ စားစရာတွေကို စိတ်ဝင်စားပုံပြတာမျိုး၊ လူကြီးရဲ့စားစရာများကို လိုချင်ပုံပြတာမျိုးပါ။ ဇွန်းလေးနဲ့ စားစရာကျွေးပါပြီဆို ပါးစပ်ကို ဖွင့်ပေးတတ်ပါပြီ။ ကလေးအများစုသည် ဒီလိုလက္ခဏာတွေကို အသက် (၆) ဝန်းကျင်ခန့်တွင် ပြတတ်ပါတယ်။
ဒါအပြင် ကလေးရဲ့ အစာချေစနစ်ဟာလည်း အစာပျော့ပျဲပျဲလေးတွေကိုခြေဖျက်နိုင်စွမ်းရှိပါပြီ။ မတ်မတ်လေးထိုင်နိုင်ပြီမို့ အစာနင် (သီး)မယ့် အန္တရာယ်လည်း လျှော့နည်းလာပါပြီ။ ကလေးကိုအစာကျွေးရင် ပက်လက်မကျွေးသင့်ပါဘူး။ ဒါဟာရှောင်ရမယ့် အချက်ပါ။ ကလေးသေးသေးလေးတွေကို ပက်လက်ကလေးနဲ့ အစာတွေ ကျွေးနေတာကို အပြင်မှာဖြစ်စေ၊ Facebook မှာဖြစ်စေ တွေ့ရရင် အရမ်းကို စိတ်မကောင်းဖြစ်ရပါတယ်။
ကလေးကို (၆) ထက်စောပြီးအစာကျွေးရင်ဘာဖြစ်မလဲ။ ပထမဆုံးကတော့ မိခင်နို့ကနေရမယ့် ပြည့်စုံမျှတတဲ့ အာဟာရဓါတ်နဲ့ ရောဂါကာကွယ်စေတဲ့ဓါတ်တွေမရနိုင်တော့ပါဘူး။ (၆) မပြည့်ခင်ကျွေးလေ့ရှိတဲ့အစာကလည်း များသောအားဖြင့် ထမင်းတစ်မျိုးပဲဖြစ်လေ့ရှိတာကြောင့် ကစီဓါတ် (အင်အားဓါတ်) ပဲရမှာပါ။ ကျန်တဲ့အာဟာရအုပ်စုတွေ မရပါဘူး။ ပြီးရင် ရောဂါကာကွယ်စေတဲ့ဓါတ်တွေ မရတော့တဲ့အတွက် ကလေးဟာ ချူချာပါမယ်။ နေမကောင်းမကြာခဏဖြစ်ပါမယ်။ အစားအစာက မသန့်ရှင်းရင် ဝမ်းလျှောဝမ်းပျက် ဖြစ်ပါမယ်။ အသက်အန္တရာယ်ရှိပါတယ်။ ကိုယ်ခံအားမကောင်းတဲ့အတွက် ရောဂါပေါင်းစုံ ဝင်လွယ်ပါတယ်။ ဒါကြောင့် ကလေးဟာ အာဟာရချို့တဲ့၊ မကျန်းမမာဖြစ်ပြီး ကိုယ်ခန္ဓာဖွံ့ဖြိုးမှုရော၊ ဉာဏ်ရည်ဖွံ့ဖြိုးမှုပါ အားနည်းပါမယ်။ ဘယ်သူမှကိုယ့်ကလေးကို ဒီလိုအခြေအနေမျိုး အဖြစ်မခံချင်ပါဘူး။
ကောင်းပါပြီ။ အသက် (၆) လထက် နောက်ကျပြီးမှ ဖြည့်စွက်စာကျွေးရင်ရော။ အထက်မှာ ပြောခဲ့ပြီးပါပြီ။ ကလေး အသက် (၆) ကျော်ရင် မိခင်နို့ကနေ ကလေးလိုအပ်တဲ့အာဟာရဓါတ် ပြည့်မီအောင် မပေးနိုင်တော့ပါဘူး။ ဒါကြောင့် ဖြည့်စွက်စာက ရမယ့်အာဟာရတွေနဲ့ ထပ်ဖြည့်ဖို့လိုပါမယ်။ လိုတာကို ဖြည့်မပေးရင် အာဟာရချို့တဲ့ပါမယ်။ အာဟာရချို့တဲ့ရင် ကိုယ်ခံအားနည်းပြီး နေမကောင်းဖြစ်ပါမယ်။ ဖွံ့ဖြိုးမှုတွေ နှေးသွားပါမယ်။
ဒါကြောင့်မို့လို့ ကလေးတွကို သူတို့ရဲ့ အသက်အရွယ်အလိုက် သင့်တော်တဲ့ စနစ်တကျ အစာကျွေးမွေးမှုပုံစံတွေနဲ့ ပြုစုစောင့်ရှောက်ပေးမှသာ အကောင်းဆုံး ကြီးထွားဖွံ့ဖြိုးပြီး ဉာဏ်ရည်ထက်မြက်နိုင်မှာပါ။ အခု ပိုစ်မှာ ဘာကြောင့် (၆) လမှာ အစာစကျွေးသင့်တာလဲဆိုတဲ့ မေးခွန်းကိုပဲ ဆွေးနွေးရသေးတာပါ။ ကျန်တဲ့ ဖြည့်စွက်စာကျွေးခြင်းနဲ့ ဆက်စပ်တဲ့ အကြောင်းအရာတွေကို ဆက်လက်ဆွေးနွေးပေးသွားပါမယ်။ ဒါကြောင့်မို့လို့ Healthy and Happy Families ရဲ့ Page လေးကို Like & See First လုပ်ထားလိုက်ပါနော်။ ပြီးရင် ဒီပိုစ်လေးကို Like & Share လုပ်ပေးပါဦးနော်။ မေးခွန်းတွေရှိရင်လည်း Comment ကနေမေးလို့ရပါတယ်။ Health and Happy Families က အာဟာရပညာရှင်တွေက မေးခွန်းတွေကို အချိန်ရသလောက် ဖြေပေးပါမယ်နော်။
Ref: Guiding Principles for Complementary Feeding of Breastfed Child by Pan American Health Organization and World Health Organization
